राजनैतिक अन्योलको निकासः स्वतन्त्रको नेतृत्वमा सरकार

वर्ष ९, अंक ४३ (२०६९ माघ २६ गते शुक्रबार प्रकाशित)

राजनैतिक अन्योलको निकासः स्वतन्त्रको नेतृत्वमा सरकार

    देशका प्रमुख दलहरुबाट देश र जनताको हितमा त्याग र सेवा गर्न नसकेको कारण राजनैतिक अन्योल झनझन बल्झिँदै गैरहेको छ ।
    राजनैतिक अन्योलको समयमा विदेशी चलखेलले प्रसय पाइरहेको छ । संविधानसभाको अवसान भएको पनि आठ महिना भैसक्यो । प्रमुख चार राजनैतिक दलहरु राजनैतिक निकासको लागि सहमति हुन सकेको छैन । राष्ट्रपतिबाट ९ पटकसम्म समयसीमाको आह्वान गर्दा पनि असफल भयो सहमतिको सरकार । अहिले विपक्षीहरु सडक आन्दोलनमा उभिएपछि दलीय सहमतिको सम्भावना धेरै टाढा पुगेको छ ।
    नेपालको राजनीतिक इतिहासमा ४६ सालदेखि संसदीय अभ्यास प्रधानमन्त्रीको प्रत्यक्ष नेतृत्वमा संचालित रह्यो । गणतन्त्रसँगै राष्ट्रपतिको व्यवस्थामा पनि कार्यकारी अधिकार प्रधानमन्त्री मै निहित रहेको र आफ्नै दलीय मन्त्रीहरुको भागबन्दाले देशको यो अवस्थामा पुगेको सबैमा जगजाहेर छ । त्यसैले नेमकिपाले देशमा राष्ट्रपतिलाई कार्यकारी अधिकार दिनुपर्ने आफ्नो घोषणा पत्रमा उल्लेख गरी देशको विकासको लागि स्वतन्त्र तटस्थ बुद्धिजीवीहरुलाई मन्त्रिमण्डल गठन गर्नुपर्ने आवाज उठाएको हो ।
    अहिले वर्तमा अन्योलको लागि पनि नेमकिपाले राष्ट्रपतिमार्फत स्वतन्त्र तटस्थ व्यक्तिको चुनावी सरकार गठन गरी संसदीय निर्वाचन गर्नुपर्ने उत्तम उपाय दिएका छन् ।
    मुलुकका प्रमुख दलले अन्ततोगोता यो उपायलाई अवलम्बन गरिएन भने नेपाल झनझन असफल राष्ट्र हुनेमा शंका छैन ।
    स्वतन्त्र र तटस्थ व्यक्तिको नेतृत्वमा सरकार गठन गरी चुनावमा भाग नलिने, बुद्धिजीवीहरुको सरकार गठन गरेमा अहिले विरोधमा रहेका र सत्तारुढको लागि मान्य हुनेछ । त्यसको लागि अब न्यायप्रेमी, विवेकशील नेपाली जनताले दवाव सृजना गरी निकास निकाल्नु जरुरी ठान्दछु ।