काठमाडौंमा मतदाता संख्या दस प्रतिशतले कमी

वर्ष १०, अंक २४ (२०७० भाद्र २८ गते शुक्रबार प्रकाशित)

काठमाडौंमा मतदाता संख्या दस प्रतिशतले कमी

    काठमाडौं । सबैभन्दा धेरै निर्वाचन क्षेत्र भएको काठमाडौंमा यसपटकको निर्वाचनमा मतदाताको संख्या घटेको छ ।
    अघिल्लो संविधानसभा निर्वाचनमा काठमाडौंमा मतदाताको संख्या पाँच लाख ९७ हजार ६३१ रहेको  थियो । यो संख्या घटेर आगामी निर्वाचनमा पाँच लाख ४१ हजार मतदाताले आफ्नो मताधिकार प्रयोग गर्दैछन् ।
    जिल्ला निर्वाचन कार्यालय काठमाडौंका शम्भुप्रसाद चालिसे बसाईसराई, मृत्यु तथा तस्बीरसहितको मतदाता नामावली सूचीकृत गर्न व्यक्ति स्वयंको उपस्थिति हुनुपर्ने जस्ता कारणले  मतदाता संख्या घटेको बताउनुहुन्छ ।
    निर्वाचन आयोगले मतदाता सूचीमा आफ्नो नाम सूचीकृत गर्नका लागि अनिवार्य नेपाली नागरिकताको प्रमाणपत्र हुनुपर्ने, दैनिक मजदुरी गर्ने श्रमजीवी वर्गमा आएको राजनीतिक वितृष्णा र स्वयं उपस्थित भई फोटो खिचाउनुपर्ने कारण मतदाता संख्या घटेको हो ।
    अघिल्लो संविधानसभको निर्वाचनमा भन्दा यसपटकको निर्वाचनमा ५७ हजार ६३१  मतदाताको संख्या घटेको छ ।  काठमाडौंमा ११ निर्वाचन क्षेत्र कायम गरिएको छ । मुलुकको राजधानी भनेर चिनिएको काठमाडौंमा ठूला पार्टीका शीर्ष नेताहरूले उम्मेदवारी घोषणा गरेपछि मुलुकमा निर्वाचनको वातावरणको तापक्रम एक्कासी बढ्न थालेको निर्वाचन आयुक्त डा. अयोधीप्रसाद यादवले बताउनुभयो ।