गाईको दूध बजारमा

वर्ष ९, अंक ४६ (२०६९ फागुन १८ गते शुक्रबार प्रकाशित)

गाईको दूध बजारमा

    दुग्ध विकास संस्थानले फागुन १६ गते बुधबारबाट शुद्ध गाईको दूध काठमाडौं बजारमा ल्याएको छ ।

    गाईको दूधको उपभोगको लागि र धार्मिक प्रयोजनमा समेत प्रयोग गर्ने हेतुले माग धेरै भएकोले बजारमा ल्याएको कृषि विकास मन्त्रालयका प्रवक्ता प्रभाकर पाठकले बुधबार दुग्ध विकास प्रशोधन केन्द्र बालाजुमा आयोजित पत्रकार भेटघाटमा बताउनु भएको हो ।

    कार्यक्रममा दुग्ध विकास संस्थानका महानिर्देशक शियाराम सिँहले पनि गाईको शुद्ध दूधको माग बढेकोले अलग्गै प्रशोधन केन्द्र र अलग्गै ढुवानीको व्यवस्था गरेको जनाउनु भयो । ५०० मि.लि.को प्याकेटमा उपलब्ध हुने सो दूधको मूल्य प्रति प्याकेट रु.३०।– कायम गरेको छ ।

    चिल्लो (फ्यायट ३.५%) रहने सो दूधको बजारिकरणले गाई पालन साथै गाईको बाच्छा उत्पादनमा बृद्धि गराउन किसानलाई थप प्रोत्साहन मिल्ने संस्थानले विश्वास लिएको छ ।

    साथै संस्थाले यही चैत्र महिनाबाट मही (वटर मिल्क) उत्पादन गरी नेपालगन्ज, धनगढी साथै पूर्व तराई ज्यादा गर्मी क्षेत्रमा बिक्री वितरण गर्ने योजना रहेको छ । आधा लिटरको रु.१५।– मूल्य कायम रहने पनि जनाएको छ ।

    सोमबार सूचना तथा संचार मन्त्रालयमा भएको प्रवक्ता–पत्रकार भेटघाटमा पनि कृषि विकास मन्त्रालयका प्रवक्ता डा. प्रभाकर पाठकले दुग्ध संस्थानको गाईको दूध र मही बजारमा ल्याइने कुराको सार्वजनिक गर्नुभएको थियो ।