दशैंको मुखमा महङ्गी

वर्ष १०, अंक २४ (२०७० भाद्र २८ गते शुक्रबार प्रकाशित)

दशैंको मुखमा महङ्गी

     तपाईं धेरै दिक्क भइसक्नु भयो होला । जुन जोगी आए पनि कानै चिरेको अर्थात् जुन सरकार आएपनि जनतामारा ।
    स्वतन्त्र र चुनावी मन्त्रिमण्डलका अध्यक्ष खिलराज रेग्मी पनि आखिर कानै चिरेको प्रधानमन्त्री सावित भए ।
    प्रम बनेको ४ महिनामै संविधानसभाको निर्वाचन दोस्रो सफलता पूर्वक सम्पन्न गर्ने मुख्य लक्ष्य लिई आएकाले सरुवा बढुवा त हुँदै गरे भने अन्ततः पेट्रोलियम पदार्थमा मूल्यवृद्धि गरेर जनतामारा समेत कार्य गर्न भ्याए ।
    नेपाली जनताको महान चाड विजया दशमीको मुखमा गरिएको मूल्यवृद्धिले नेपाली जनताको ढाड सेकिएको छ । अव पेट्रोल ५ रुपियाँ वृद्धि सँगै १२५ बाट १३० रुपैयाँ भएको छ भने डिजेल र मट्टितेलमा ३÷३ रुपैयाँ बृद्धिसँगै १०० बाट १०३ प्रति लिटर पुगेको छ भने हवाई इन्धन ७ रुपैयाँले वृद्धि गरेको छ ।
    अब अनियन्त्रित बजार मूल्य थप अनियन्त्रित हुनेछ भने महङ्गीले आकास छुने भएको छ  । सरकार देश र जनताप्रति वफादार हुनुहुन्छ भने दैनिक प्रयोग गरिने कुनै पनि वस्तुमा मूल्यवृद्धि गरिँदैन उपभोग्य वस्तुमा गरिने सेवा सुविधा अन्यबाट पुरा गर्नु पर्दछ ।
    अहिले सम्ममा हरेक सरकार पंचायती निरंकुश शासनलाई माथ गर्दै ४६ साल पछिका कथित जनताको सरकारले नेपाली जनतालाई महङ्गी उपहार दिएका छन् । नेपाली काँग्रेस, एमाले, एमाओवादी जनविरोधी काम गर्न, महङ्गी वृद्धि गर्न को भन्दा को कम जस्तै गरे भने खिलराज रेग्मी पनि त्यो कार्यबाट अछुटो रहन
सकेनन ।
    तपाईं हामीले हामी सबै नेपाली जनताको हित गर्ला भनेर पटक पटकको निर्वाचनमा जिताएर पठाउनु आखिर जनतमाथि कुशासन गर्ने लाइसेन्स र अनुमति दिनु सरह भएको छ । जनविरोधी कार्य पूँजीवादी सरकारको सोच हो । जुन कार्य कम्यूनिष्ट भनाउँदाले नै पुरा गरिरहेको छ । अब फेरि संविधानसभाको चुनाव नजिकिँदैछ । तपाईंको भोट फेरि त्यस्ता पार्टी र व्यक्तिलाई मत दिँदै हुनुहुन्छ कि सही विकल्प खोज्नु हुन्छ । पटक पटक हेर्दा पनि हामी नेपाली जनताले सही विकल्प र विवेक खोज्न सकेन भने हाम्रो भविष्य हामीले नै धिकारेको हुनेछौं ।
    समय लाग्छ सही विचार र सही विकल्पको विकास रोज्ने बेला आएको छ ।