३३ दलीय मोर्चाद्वारा आन्दोलनको घोषणा

वर्ष १०, अंक २२ (२०७० भाद्र १४ गते शुक्रबार प्रकाशित)

गोलमेच सम्मेलन गोलमालपछि

३३ दलीय मोर्चाद्वारा आन्दोलनको घोषणा

    काठमाडौं । नेकपा–माओवादी नेतृत्वको ३३ दलीय मोर्चाले संविधानसभा निर्वाचनको उम्मेदवारी दर्तालाई लक्षित गरी बन्दसहितका आन्दोलनका कार्यक्रम सार्वजनिक गरेको छ ।  माओवादी पार्टी केन्द्रीय कार्यलयमा बुद्धनगरमा बुधबार बसेको ३३ दलको संयुक्त बैठकले आन्दोलनका कार्यक्रम घोषणा गरेको हो ।

    घोषित कार्यक्रम अन्तरगत भदौ १३ गते राष्ट्ररपतिलाई ज्ञापन पत्र बुझाइयो, भदौ दोस्रो साता नागरिक समाज, बुद्धिजिवी लगायतसंग छलफल गर्ने, र सबै जिल्ला तथा निर्वाचन क्षेत्रमा ३३ दलीय मोर्चा विस्तार गर्ने रहेका छन् । ३३ दलले भदौ २७ गतेबाट असोज १ गतेसम्म क्षेत्रस्तरमा बन्द गर्ने घोषणा गरेको बैठकले २७ गते पूर्व, २८ गते सुदूरपश्चिम, ३० गते पूर्वी तराई, ३१ गते मध्यपश्चिम र १ गते मध्य पहाड बन्दको आह्वान गरेको छ ।

    २ गतेदेखि ७ गतेसम्म मुख्य शहरहरुमा बहिस्कार सभा गर्ने मोर्चाले निर्णय गरेको छ । यस अन्तरग २ गते जनकपुर र बुटबल, ३ गते चितवन र इटहरी, ४ गते विराटनगर र धनगढी र ७ गते काठमाडौं र पोखरामा बहिस्कार सभा गरिने छ । ३३ दलले उम्मेदवारी दर्तालाई लक्षित गरी असोज ९ र १० गते नेपाल बन्द घोषणा गरेका छन् ।

    निर्वाचन आयोगले सार्वजनिक गरेको तालिका अनुसार असोज १० गते प्रत्यक्ष तर्फको उम्मेदवारी दर्ताको कार्यक्रम छ । सरकार र उच्चस्तरीय राजनीतिक समितिसंग वार्तामा बसे पनि निवाचनको मिति र गोलमेच सम्मेलनमा सहमती जनाउन नसकिने सरकार र सरकार पक्षधर दलहरुले बताएपछि आक्रोशित बनेको मोर्चाले निर्वाचन बहिष्कार गर्ने चेतावनी दिँदै आएको छ ।