कस्तो पार्टी चुनाव उठ्दैछ ? – १

वर्ष १०, अंक २३ (२०७० भाद्र २१ गते शुक्रबार प्रकाशित)

कस्तो पार्टी चुनाव उठ्दैछ ? – १

राजनीति फोहोरी खेल हो ? राजनीतिले देश विकास गर्दैन ? किन राजनीति गर्ने ? राजनीति प्रति वितृष्णा कसले फैलायो ?

हिजो संविधानसभाबाट संविधान कसरी बनेन ? संविधानसभाको हत्या कसरी भयो ? अहिले बन्छ भन्ने के ग्यारेन्टी ?

    राजनीति फोहोरी खेल हो ? राजनीतिले देश विकास गर्दैन ? किन राजनीति गर्ने ? राजनीति प्रति वितृष्णा कसले फैलायो ? हिजो संविधानसभाबाट संविधान कसरी बनेन ? संविधानसभाको हत्या कसरी भयो ?, आदि इत्यादि प्रश्न नेपालको आकासमा घुमिरहेका छन् । जनता प्रश्न तेस्र्याइरहेका छन् । मंसीर ४ गते दोस्रो संविधान सभाको निर्वाचन हुँदैछ । समयसीमा अनुसार अब निर्वाचन आउन मात्र ७४ दिन बाँकी छ । निर्वाचनमा सत्तासिन दलहरु जसरी पनि चुनावी माहोल बनाउन न्वारानदेखिको बल निकाल्दै छन् । विशेष गरी एमाओवादी, एमाले, नेपाली काँग्रेस तीनै दल कोही दुई तिहाई बहुमत, कोही सामान्य बहुमत भए हामी संविधान बनाएर देखाइदिन्छौं भनिरहेका छन् ।
    यस्तो अवस्थामा यहाँ राजनीति देखि दलको राजनीतिसम्म बहस गर्ने कोसिस गर्नेछु ।
राजनीति के हो ?
    सबै नीतिहरुको राजा राजनीति हो । राजनीतिबाट घर परिवार, व्यक्ति, समाज र देश अछुटो रहन सक्दैन ।
    परिवारको व्यवस्थित गर्न, समाजमा सुसजित समाज निर्माण गर्न र राष्ट्रको भविष्य सुन्दर बनाउन हामीले नीति निर्माण गर्ने गर्दछ । जे जस्तो नीति निर्माण गरेपनि त्यो राजनीति नै हो । राजनीति दलीय नीति मात्र हुन्छ भन्ने होइन सबै क्षेत्रमा राजनीति चल्छ । राजनीतिले बहुसंख्यक जनताको हितमा नीति बनाउन सक्यो भने त्यो राष्ट्रको लागि हितकारी हुन्छ होइन राजनीति गलत नीतिमा परिणत भयो भने समाज, देश र जनताको लागि घाटक हुन सक्दछ ।
    जनविरोधी र घाटक नीति लिएपछि राजनीति फोहोरीको संज्ञा दिन थालेको हो ।
    तपाईं हामीले बुझ्नु पर्ने कुरा राजनीति फोहोरी खेल होइन राजनीतिलाई प्रयोग गर्ने राजनीतिज्ञको मति बिग्रिएको भन्नु पर्दछ । अझ स्पष्ट रुपमा भन्ने हो भने राजनीतिज्ञ जुन दलले देशको शासन सत्ता हातमा लिएकाहरुबाट जनताको स्वार्थलाई तिलाञ्जली दिएर आफ्नो दलको, कार्यकर्ताको स्वार्थवस काम गरिएपछि फोहोरी हुने हो । त्यसकारण राजनीतिलाई फोहोर न कि राजनीतिज्ञ फोहोरी भन्ने हामीले बुझ्नुपर्दछ ।
    नेपालको राजनीतिक परिवर्तन उतार चढाव छिटो छिटो भैरहेको छ ।
    संसदीय प्रजातन्त्रको जननी बेलायतमा २०० वर्ष लागेको परिवर्तन नेपालको सन्दर्भमा १०÷१५ वर्ष नै नलागेको हामी आफैले भोगिरहेका छौं देखिरहेका छौं ।
    विशेषत राणा शाही जहानिया शासन उल्टाउन १०४ वर्ष लाग्यो भने त्यसपछि ७ साल १७ साल, ३७, ४६, ५६, ६२ साल हेर्दा १० वर्षको अन्तरालमा राजनैतिक परिवर्तन भैरहेको छ ।
किन राजनीति ?
    छोटो समयमा परिवर्तन भएको राजनीति बाँदरको हातमा नरिवल झैं भैरहेको छ । राजनीति किन र कसका लागि भनेर नै यकिन सत्तासिन राजनीतिक दलहरुले गर्न सकेन । माथि उल्लेख गरेझैं राजनीतिक परिवर्तन दलहरुको लागि सत्तारोहणको भ¥याङ्ग मात्र सिद्ध भैरहेको छ । दलीय स्वार्थी, भागवण्डामा पूर्ण रुपले डुबेका छन् सत्तासिन दलहरु । मौका आउँछ पर्खदैन भनेझैं यही मौकामा स्वार्थीको चौका हानी हाल्नुपर्ने मानसिकताले देशलाई यो अन्यौलतामा पुर्यायो ।
    ४६ सालपछिको परिवर्तनमा देश र जनताको हितमा काम गर्ने कशम खाएका पार्टी नेका, एमाले र अन्य पार्टीले पालैपालो शासन गरेको हाम्रो दिमागमा अहिले पनि ताजै छ ।
    ६२ सालपछि पनि नेका, एमाले, मधेसी पार्टीहरु र १० वर्ष जनयुद्धकारी एमाओवादी समेतले सत्तारोहण गर्न पायो । तर सबै सत्तारोहीहरु गाँसेगुँसेहरु एकै नासे । मौका नपाएसम्म मात्र इमानदार बनेका पाइयो ।
    अहिलेको राजनीतिक क्षेत्रमा संविधानसभाको दोस्रो निर्वाचनमा तीनै पार्टी जसले हिजो राष्ट्र ब्रम्हलुट गरेका नै चुनावमा सामान्यदेखि दुईतिहाई बहुमत ल्याउने चुरिफुरिमा जनतालाई फेरि खाडलमा पुर्याउन, भ्रम सृजना गर्न तल्लीन भएका छन् । अहिलेको जनता १७ औं शताब्दीका होइनन् । विवेकशील र सही र गलत छुट्याउन सक्ने जनता भएका छन् । अब जनताले सही कुराको सही राजनीति सही ठाउँमा प्रयोग गर्ने बेला आएको छ ।

– नारायण मजर्हन