निकासको लागि त्याग जरुरी

वर्ष ९, अंक ३३ (२०६९ मंसिर १५ गते शुक्रबार प्रकाशित)

निकासको लागि त्याग जरुरी

    हाम्रो देश नेपाल यस्तरी बिग्रेला भनेर कसैले सोचेका छैनन् होला । राणाकालको शासनदेखि गणतन्त्र नेपालसम्मका सत्तारुढ दलहरुले देश र जनताको पक्षमा सेवा गर्छु भनेर कसम खाएका थिए । राणाको अन्याय सहन नसकेर ७ सालको क्रान्ति, पंचायती शासनको अन्याय सहन नसकेर ०४६ सालको जन आन्दोलन, प्रतिगमनको विरुद्ध ०६३ सालको लोकतन्त्र आन्दोलन जसले गणतन्त्र सम्म पुर्यायो । हरेक आन्दोलन प्रगतिशील हुन्थ्यो र हुनुपर्दछ ।

    तर अहिले सम्मको नेपालको इतिहासमा सत्ताबाहिर छँदा जति देश र जनताको सेवामा प्रतिबद्धता र लोभिपापीको त्याग ओकल्दछन्, सत्तामा पुगेपछि प्रतिबद्धता सबै बिर्सन्छन् र त्याग सबै कुर्सीमा तासिन्छन् । गणतन्त्रको चार प्रम यसैका सिकार भए । सत्ता छोडन परे गोली खान तयारको अभिव्यक्त आउँछन् अनि त्याग भावना कहिले आउँलान् ?

    कुर्सीको लागि गोली खाएर मर्न तयार हुने तर देश र जनताको हितमा कुर्सी त्याग्न नसक्ने ?

    देशमा राजनैतिक निकास चाहिएको छ । संवैधानिक शुन्यता भर्नुपर्दछ । भोलि निर्वाचित भएर आउँदा पनि राजनैतिक दलका प्रतिनिधि नै आउने हुन् । अहिलेको समयमा सबैले आ–आफ्नो डम्फु बजाउँन त्याग्नु पर्दछ ।

    कोही हार्न नचाहेकोले नै राजनैतिक निकासको लागि स्वतन्त्र तटस्थ व्यक्तिको लागि नेतृत्व त्याग गर्न सक्नु धेरै बुद्धिमानी हुनेछ ।

    तटस्थ व्यक्तिको एउटै ध्येय निर्वाचन सम्पन्न गर्नुमात्र हुने गरी सबै दलले सहमति गरेमा कसैको साख गिर्ने छैन । तटस्थ व्यक्तिले हरेक कार्य पुरा गर्न सक्दछ । आफूले गल्ति गरेजस्तै अरुले पनि गल्ति गर्ला भनेर सोच राखी स्वतन्त्र व्यक्तिलाई सत्ता हस्तान्तरण सहमति गर्न नमान्नु देश अझ संकटग्रस्त बनाउने चाला मात्र हो । देशमा फेरि वैदेशिक चलखेल सुरु भएको छ । नेताहरु नेपाली जनताको मन जित्न होइन विदेशी कुटनितिकज्ञको इसारामा नाँच्न चाहिरहेको प्रष्ट हुँदैछ । देश एउटा कानुनी विधि अनुसार चलाउन दिन अब नेपाली जनताले संवैधानिक शुन्यताको अन्त्य गर्दै सही निकास निकाल्न स्वतन्त्र व्यक्तिको नेतृत्वमा सरकार गठन गराउन आवाज उठाउनु जरुरी छ ।