काठमाडौं जिल्ला सम्मेलन सफलताको शुभकामना

वर्ष ९, अंक ३५ (२०६९ मंसिर २९ गते शुक्रबार प्रकाशित)

काठमाडौं जिल्ला सम्मेलन सफलताको शुभकामना

    नेपाल मजदुर किसान पार्टीको चौंथौं काठमाडौं जिल्ला सम्मेलन मंसिर ३० र पुस १ गते दुई दिन हुन गइरहेको छ ।

    मंसिर ३० गते पार्टीका श्रद्धेय अध्यक्ष का. नारायणमान बिजुक्छें (रोहित) बाट बसन्तपुरमा उद्घाटन गरिने सो सम्मेलनको सफलताको कामना गर्दछु ।

    मुलुकमा राजनैतिक अन्योल र संविधानिक शुन्यताले देशको भविष्य कता जाँदैछ भन्ने अनिश्चित भैरहेको छ । २ वर्षमा बनाउनुपर्ने संविधान ४ वर्षमा पनि बनेन र अन्ततः संविधानसभा नै विघटन गरायो । काम चलाउ सरकारको आयु सहमति सहमति सुगा घोकाई गर्दै लम्ब्याउँदै छ सत्तारुद्ध दलबाट ।

    राष्ट्रपतिले पटक पटक गरी चौंथो पटकसम्म सहमति सरकार बनाउन सार्वजनिक आह्वान गरेपनि सहमति व्यर्थ भएका छन् भने प्रमुख प्रतिपक्ष दलहरु सरकार बनाउन असफल छन् ।

    देशमा विदेशी हस्तक्षेप बढ्दै छन् । राष्ट्रपति देखि सत्तारुढ दलका नेताहरुलाई मन्त्र पाठ सिकाउँदै छन् । करण सिँहको कमाल योजनामा झण्डै सहमति भएर हतारमा नेकाले सुशील कोइरालालाई प्रधानमन्त्रीको नाम प्रस्तावित पनि असफल भएको छ ।

    सहमतीय सरकारको लागि सर्त राखेपनि प्रतिपक्षले संविधानको मान मर्यादामा सर्त नमान्ने निर्णय गरी सत्तारुढ दल प्रतिपक्षबीच द्वन्द्व बढ्दै छ । देशमा सरकारले खानेपानी, फोहोर मैलाको व्यवस्थापन, विद्युत आपूर्ति गर्न असफल छन् भने अति आवश्यक बस्तुको अधिकत्तम मूल्य (MRP) तोकेपनि महङ्गी आकासिएको छ ।

    देशमा राजनैतिक, सामाजिक, सांस्कृतिक हरेक क्षेत्रमा असफलता भैरहेको समयमा बसन्तपुरको खुल्ला क्षेत्रमा नेमकिपाको चौंथौं काठमाडौं जिल्ला सम्मेलन महत्वपूर्ण रुपमा लिइएको छ ।

    नेमकिपा नेपालको राजनैतिक इतिहासमा प्रकाश स्तम्भको रुपमा रहेको छ । नेमकिपाले जे बोल्छ त्यो भई छाड्छ भन्ने धारणा आम नेपालीमा छाप परेको छ ।

    राजनैतिक परिवर्तनमा ४६ सालको जनआन्दोलन भक्तपुर काण्ड नेमकिपालाई ध्वस्त पार्न रचिएको षड्यन्त्रको फल हो, बहुदलपछि राजनैतिक भ्रष्टाचार र लुटको विरोधमा नेमकिपाले कुनै सुविधा नलिनु राजनैतिक इमानदार र नैतिकता ज्वाज्वल्यमान छ, प्रतिगमन विरुद्ध आन्दोलनमा राजनैतिक निकास व्यवस्थापिका संसदको पुनःस्थापना निकासको विचारले राजतन्त्रको अन्तसँगै गणतन्त्र स्थापना भएको छ ।

    पूँजीवादी गणतन्त्र होइन समाजवादी गणतन्त्रको वकालत गर्ने नेमकिपा एक्लो पार्टी भएको छ । अहिलेको राजनैतिक अन्योलमा पनि राष्ट्रपति शासन लागु गरी तटस्थ व्यक्तिको सरकारको निर्माण गर्नुपर्ने आवाज सशक्त हुँदैछ । देश र जनताको हितमा अझ सशक्त आवाज र विचार यो सम्मेलनले दिने विश्वास गर्न सकिन्छ ।