अमेरिकी साम्राज्यवाद– सिरिया छोड !

वर्ष १०, अंक २३ (२०७० भाद्र २१ गते शुक्रबार प्रकाशित)

अमेरिकी साम्राज्यवाद– सिरिया छोड !

    काठमाडौं । मध्यपूर्वी देश सिरियामाथि संरा अमेरिकाको युद्ध धम्की र सैन्य हमलाको विरोधमा मङ्गलबार नेपाल मजदुर किसान पार्टीका जनवर्गीय सङ्गठनहरू नेपाल क्रान्तिकारी युवा संघ र नेपाल क्रान्तिकारी विद्यार्थी संघले काठमाडौंस्थित संरा अमेरिकी राजदूतावासमा विरोध पत्र बुझाएका छन् ।
    अमेरिकी साम्राज्यवादविरुद्ध नाराहरू लेखिएका प्लेकार्ड बोकेका युवा–विद्यार्थीहरूले सिरिया, इराक, अफ्गानिस्तान, लिविया, आदि देशहरूमा अमेरिकी हमला र हस्तक्षेपको विरोधमा दूतावासअघि नाराबाजीसहित प्रदर्शन गरेका थिए ।
      प्रदर्शनकारीहरूले दूतावासका सुरक्षा सहचरी कोलिन बक्नरलाई विरोध पत्र बुझाएका थिए ।
    सो क्रममा भएको कोणसभामा बोल्दै नेक्रायुसंघका अध्यक्ष उकेश कवांले अमेरिकी प्रजातन्त्र र मानव अधिकार पाखण्डमात्र भएको बताउँदै सिरियाको घटनाक्रमले पुनः एकपटक विश्वसामु उदाङ्गिएको बताउनुभयो । उहाँले सिरियामाथि अमेरिकी हमलाको विरोध साम्राज्यवादविरोधी आन्दोलनको सिलसिला भएको बताउनुभयो ।
    नेक्राविसंघका अध्यक्ष रवीन्द्र ज्याख्वले संसारभरका न्यायप्रेमी जनता सिरियामा संरा अमेरिकी हमलाको विरोधमा उत्रिएको बताउनुभयो । उहाँले भारतीय विस्तारवादको हस्तक्षेपविरुद्ध संघर्षरत नेपाली युवा–विद्यार्थीहरूले सिरियामाथि हमलाको विरोध गर्नु अन्तर्राष्ट्रिय कर्तव्य भएकोमा जोड दिनुभयो ।
    कार्यक्रममा नेक्रायुसंघका केन्द्रीय सहसचिव शङ्कर भण्डारी र नेक्राविसंघका केन्द्रीय सचिव नीरज लवजूले पनि बोल्नुभएको थियो ।
    विरोध पत्रमा भनिएको छ – सिरिया मध्यपूर्वको स्वतन्त्र र सार्वभौम देश हो । सिरियाका राष्ट्रपति बसाद अल अस्सादको सरकार सिरियाली जनताको अनुमोदन प्राप्त सरकार हो । तर संरा अमेरिकाले सिरियाको तेल खानी कब्जा गर्न विगत २८ महिनादेखि सिरियाका कथित विद्रोहीहरुलाई आर्थिक र हतियार सहयोग गर्दै आएको र राष्ट्रपति अस्सादलाई हटाउने असफल प्रयास गरिरहेको छ । हालै संरा अमेरिकालगायतले सिरियाको सरकारलाई कथित विद्रोहीमाथि रासायनिक हतियार प्रयोग गरेको आरोप लगाउँदै थप हातहतियार पठाएर सिरियामा हस्तक्षेप र आक्रमणको तयारी गर्दैछ । सिरियाको सरकारले रासायनिक हतियार प्रयोग नगरेको स्पष्ट गरिसकेको छ ।
    सिरियामाथि संरा अमेरिकाको नेतृत्वमा बेलायत, फ्रान्स, अष्ट्रेलियालगायत देशहरुले संयुक्त आक्रमण गर्ने समाचारसँगै विश्वका न्यायप्रेमी र युद्धविरोधी जनताहरुले यसको कडा विरोध र भतर्सना गर्दैछन् ।
    बेलायतको संसदमा प्रधानमन्त्री डेभिड क्यामरुनको सिरिया आक्रमण गर्ने प्रस्ताव अत्यन्त बहुमतबाट अस्वीकृत भयो । महामहिम राष्ट्रपतिको कार्यालय ह्वाइट हाउस अगाडि नै सिरियामाथि आक्रमण गर्ने अमेरिकी तयारीको विरोधमा जनप्रदर्शन भइसकेको छ । जोर्डन, यमन, क्यानाडा, बेलायत, क्युवा, भेनेजुयलालगायत देशहरुमा सिरियामाथि अमेरिकी हस्तक्षेप र आक्रमणको तयारी विरोधमा जनप्रदर्शन भइरहेको छ ।
    सन् २००३ मा आणविक हतियार थुपारेको आरोप लगाउँदै संरा अमेरिकाको नेतृत्वमा नाटो सेनाले इराकमाथि आक्रमण गरी राष्ट्रपति सद्दाम हुसेनको हत्या गरे । तर इराकमा रासायनिक हतियार फेला परेन । संरा अमेरिका र नाटो सेनाले ४१ वर्ष लामो समयसम्म निरंकुश र तानाशाही शासन चलाएको आरोप लगाउँदै राष्ट्रपति मुअम्मर गद्दाफीको हत्या गरे र लिविया कब्जा गरे । समाजवादी देशहरु क्युवा र प्रजग कोरियामाथि आधा शताब्दीभन्दा अघिदेखि मानवताविरोधी आर्थिक नाकाबन्दी लादिएको छ । क्युवाका पाँच देशभक्त युवाहरुलाई जासुसीको आरोप लगाई संरा अमेरिकी जेलमा बन्दी बनाइएको छ । आणविक हतियार निर्माण गरेको आरोप लगाउँदै इरानमाथि आक्रमणको धम्की दिइरहेको छ ।
    युद्ध र अशान्तिको कारक पूँजीवाद, साम्राज्यवाद र विनाशकारी हतियार उत्पादन नै हो । संसारमा सबैभन्दा बढी हतियार उत्पादन गर्ने र बिक्री गर्ने देश संरा अमेरिका नै हो । हातहतियार उत्पादनमा भइरहेको खर्च मानव कल्याणमा उपयोग गर्नुपर्छ । प्रजग कोरिया र क्युवामाथि लगाइएको मानवताविरोधी आर्थिक नाकाबन्दी तत्काल हटाउनुपर्छ । पाँच क्युवाली देशभक्त युवाहरुलाई निःशर्त रिहा गर्नुपर्छ । सार्वभौम देश सिरियामाथि हस्तक्षेप र आक्रमणको तयारी तत्काल फिर्ता गर्नुपर्छ । सिरियाका कथित विद्रोहीहरुलाई आर्थिक र हातहतियार सहयोग तत्काल बन्द गर्नुपर्छ । मध्यपूर्व र बाँकी विश्वमा शान्ति कायम गर्न विश्वका विभिन्न देशबाट अमेरिकी शैन्य शिविर र हातहतियारहरु अविलम्ब फिर्ता गर्नुपर्छ ।