वरिष्ठ गायक फत्तेमानको निधन

वर्ष १०, अंक २४ (२०७० भाद्र २८ गते शुक्रबार प्रकाशित)

वरिष्ठ गायक फत्तेमानको निधन

    काठमाडौं, २५ भदौ । वरिष्ठ गायक फत्तेमान राजभण्डारीको भाद्र २४ निधन भएको छ । उहाँ ७७ वर्षको हुनुहुन्थ्यो । केही दिनअघि फोक्सोमा क्यान्सर देखिएपछि उहाँलाई ओम हस्पिटल, चाबहिलमा भर्ना गरिएको थियो ।
    विसं १९९३ मंसिर १३ मा जन्मनु भएका गायक राजभण्डारीले ४११ भन्दा बढी कालजयी गीत र भजनमा स्वर तथा सङ्गीत दिनुभएको छ । उहाँका ‘मर्न बरु गाह्रो हुन्न’, ‘यस्तो पनि हुँदो रैछ...’, ‘सान्नानीको गालैमा कालो कोठी रैछ ...’, ‘बनै खायो डढेलोले मनै खायो...’ जस्ता मर्मस्पर्शी र भावनात्मक गीतहरू तथा ‘रातो र चन्द्र सूर्य जङ्गी निसान हाम्रो’ जस्ता राष्ट्रिय गीत चर्चित छन् ।
      स्व. राजभण्डारीका श्रीमती, दुई छोरा र एक छोरी हुनुहुन्छ ।
    गायक राजभण्डारीको मंगलबारै पशुपति आर्यघाटमा वैदिक परम्पराअनुसार दाहसंस्कार (अन्त्येष्टी) गरियो । उहाँको पार्थिव शरीरमा जेठा छोरा रविन्द्र राजभण्डारीले दागवत्ती दिनुभएको थियो ।
    यसअघि उहाँको पार्थिव शरीरमा श्रद्धाञ्जली दिन पुग्नुभएका अर्थमन्त्री शङ्करप्रसाद कोइरालाले राष्ट्रिय झण्डा ओढाएर उहाँलाई सम्मान गर्नुभएको थियो । उहाँलाई श्रद्धाञ्जली दिन ठूलो संख्यामा समाजका विभिन्न क्षेत्रका व्यक्तित्वहरू पशुपति आर्यघाट पुगेका थिए ।